26/5/2026
BA MEEYA MU DIVIZONI YA KAMPALA, BA KKANSA BALAYIDDWA NGA Ekisanja EKIPYA KITADISE
Bameeya ba divizoni ne bakansala abaakalondebwa mu Kampala baalayiziddwa mu ofiisi wiiki eno, nga batandise ekisanja ky’ebyobufuzi ekipya eky’emyaka etaano okwetoloola ekibuga ekikulu Kampala .
Salim Uhuru alayiziddwa ku Lwokubiri nga Loodi Meeya wa Kampala Central Division ku mukolo ogwabadde ku City Hall nga gukubirizibwa omulamuzi omukulu Rita Kidasa. Bakansala 39 nabo baalayiziddwa.
Akola nga Town Clerk wa Kampala Central division Douglas Nsubuga, yakwasizza Uhuru ebiwandiiko by’obuyinza, omuli Ssemateeka wa Uganda eya 1995 nga bwe yakyusibwa, etteeka lya KCCA Cap 195, etteeka lya Gavumenti ez’ebitundu Cap 138 n’amateeka agafuga enkiiko za Kampala Capital City Authority. Ebiwandiiko bye bimu byakwasiddwa Bameeya ne Bakansala abalayiziddwa mu divizoni endala.
Ate kansala Lukwago Fahad olukubye ebirayiro n’ategeeza nti azze kuweereza Bannakampala era nti tagenda kubeeganya. Wano wasinzidde nategeeza nti ekifo ekyo kya nkizo nnyo kubanga kyekyetoolerwako obuweereza mu kibuga era nasuubiza nti wanaamalirako ekisanja ng’omulimu gwa kansala buli munnakampala agulaba
Kansala Lukwago Fahad
Emikolo gino gyatandika mu butongole ekisanja kya 2026–2031 eri abakulembeze ba divizoni abaweereddwa omulimu gw’okulabirira enfuga y’ebitundu n’okugaba obuweereza mu kibuga.
Mu Divizoni y’e Nakawa, omuyimbi eyafuuse munnabyabufuzi Ali Bukeni amanyiddwa ennyo nga Nubian Li yalayiziddwa ku bwameeya wamu ne bakansala.
Meeya wa Divizoni y’e Makindye, Yasin Omar naye alayiziddwa ku mukolo ogwabadde ku kitebe kya divizoni eno, nga nabo bakansala baalayiziddwa.
Mu Divizoni y’e Lubaga, Mawula Mberaze Zacky alayiziddwa ku bwameeya.
Divizoni y’e Kawempe yakoze omukolo gw’okulayira nga May 25, Emmanuel Sserunjogi gye yatandikira mu butongole ekisanja kye ku bwameeya ng’ali wamu ne bakansala.
Kati divizoni ettaano zisuubirwa okulonda sipiika n’abamyuka ba sipiika ku nkiiko zaabwe mu nnaku ezijja. Bameeya ba divizoni nabo basuubirwa okulonda obukiiko obufuzi obugenda okulondoola enzirukanya y’emirimu n’okussa mu nkola pulogulaamu z’olukiiko.
Abakulembeze abapya bayingidde ofiisi nga Kampala eyolekedde okusoomoozebwa mu bibuga okweyongera, omuli amazzi amabi, okweraliikirira ku kuddukanya kasasiro, omugotteko gw’ebidduka n’okunyigirizibwa ku bakozi ba gavumenti.
Bya Mugula Dan
