Omuwandiisi ow’enkalakkalira mu minisitule y’ebyobulamu, Dr Diana Atwine akakasizza eggwanga nti Gavumenti etaddewo enkola ez’amaanyi ez’okwetegekera n’okuddamu oluvannyuma lw’okuzuula abalwadde babiri abayingira mu ggwanga n’ekilwadde ki Ebola e Bundibugyo nga beenyigira mu bannansi ba Congo.
Bwabadde ayogerera mu lukungaana lwa bannamawulire ku Uganda Media Center ku Lwokusatu, Dr Atwine akakasizza nti omulwadde omu gw’ebabadde balabirira atereedde,ate omulwadde owookubiri agenda atereera buli lukya oluvanyuma lw’okukeberebwa nga tafunye Ebola nga 18 ne 20 May 2026.
Abikudde ekyama nti n’okutuusa kati abantu 127 bebateberezebwa ne bateekebwa mu kalantiini y’ebitongole ng’omu ku kaweefube w’okuziyiza ekilwadde ki Ebola agenda mu maaso.
Dr Atwine agamba nti Gavumenti, wansi wa National Task Force ekubirizibwa omumyuka wa Pulezidenti, ayongedde amaanyi mu kampeyini z’okumanyisa abantu mu ggwanga lyonna, ayongedde okunyweza obusobozi bw’okukebera n’okujjanjaba abantu ku nsalo, n’okuyimiriza okumala akaseera emirimu gy’entambula egyalondebwa egy’okusala ensalo wakati wa Uganda ne Democratic Republic of Congo okukendeeza ku bulabe obulala obw’okuyingiza ebintu mu ggwanga.
Minisitule y’ebyobulamu era yalangiridde okwongera okulawuna ensalo, okuyimiriza obutale bwa buli wiiki mu masaza amatono ku nsalo okumala akaseera, n’okussaawo obukwakkulizo ku nkuŋŋaana ennene ez’olukale ku bitundu by’ensalo.
Dr Atwine yagumizza abantu nti amasomero gagenda kuggulwawo ku budde kyokka nga balina okugoberera ennyo emitendera gya Minisitule y’ebyobulamu egy’omutindo gw’emirimu.
Yasabye Bannayuganda okubeera abakkakkamu, okubeera obulindaala, okugoberera ebiragiro byonna eby’ebyobulamu, n’okuloopa mu bwangu abantu abateeberezebwa okuba nga balina obulwadde buno mu ddwaaliro eriri okumpi.
