Omumyuka wa Pulezidenti wa Uganda, Jessica Alupo, azzeemu okukakasa obweyamo bwa Kabineti eri obukulembeze obulina empisa, obuvunaanyizibwa, n’obutagumiikiriza enguzi mu lukungaana lwa baminisita olugenda mu maaso mu National Leadership Institute (NALI), Kyankwanzi.
Bwabadde ayogerako eri baminisita,n’abawandiisi ab’enkalakkalira, omumyuka wa Pulezidenti yasiimye Pulezidenti olw’obwesige bwe yamuteeka mu ye ne Kabineti yonna, n’asuubiza nti Gavumenti tegenda kubulankanya bwesige obwo.
Yayozaayoza Pulezidenti olw’okulonda obulungi Kabineti n’alaga ebikulu ebituukiddwaako mu ggwanga, omuli emirembe ,ebyenfuna ebirungi ebiri mu ggwanga, n’alaga nti biwa essuubi eri Bannayuganda mubulungi ku nteekateeka za Uganda ez’enkulaakulana.
Alupo agamba nti enteekateeka y’okusomesa baminisita okumala ennaku kkumi nkulu nnyo mu kuwa Baminisita okumanya n’obukugu obwetaagisa okusobola okutuusa obuweereza obulungi, n’akikkaatiriza nti okuyiga obutasalako kukyali kwetaagisa mu bukulembeze bwa gavumenti.
Yalaze obweyamo bwa Gavumenti eri enteekateeka y’enkulaakulana y’eggwanga n’enkola y’enkulaakulana eya 2026–2031, egenderera okwanguya Uganda okukyuka okudda mu mbeera y’abafuna ssente eza wakati n’okutuuka ku nkulaakulana ey’olubeerera mu by’enfuna.
Omumyuka wa Pulezidenti yazzeemu okulaga obwenyamu okulwanyisa enguzi, obutakola bulungi n’okulwawo okussa mu nkola, n’alaga nti Kabineti yeewaddeyo okulaba ng’enteekateeka n’ebiragiro bya Pulezidenti bituusibwa mu budde.
Yayongedde okulaga ebintu ebikulu omuli okukulaakulanya eby’obulimi, okutumbula eby’obulambuzi, ssaayansi, tekinologiya n’obuyiiya, wamu n’okwongera omuwendo, okutumbula okutunda ebweru w’eggwanga n’okukyusa ebintu ebiyingizibwa mu ggwanga.
Alupo era azzeemu okukakasa nti Gavumenti yeewaddeyo okukola enteekateeka enkulu nga Parish Development Model, Emyooga, Women’s Fund ne Youth Livelihood initiatives, ezigenderera okunyweza enkola y’okuyingiza abantu mu by’ensimbi n’okuyingiza ssente mu maka.
Yasabye obumu n’obuvunaanyizibwa obw’awamu mu kabineti okulaba ng’ebintu Gavumenti by’ekulembeza mu kukyusa Uganda biteekebwa mu nkola obulungi.
Bya Mugula Dan
